O tenente de alcalde do Concello de Lugo, Rubén Arroxo (BNG), asegurou que os buses urbanos non se verán afectados e “continuarán sendo os máis baratos de Galicia e os terceiros máis económicos de todo o Estado” a pesar de que “non foi renovado o decreto do Estado que permitía os descontos no transporte público.

Así o anunciou este xoves o edil, responsable da área de Mobilidade, que destacou o compromiso do goberno de local por manter un transporte accesible e sustentable para a cidadanía.

“En Lugo queremos que o transporte urbano siga sendo unha opción cómoda e accesible para todas as persoas, e manter as tarifas actuais é unha ferramenta crave para mellorar a accesibilidade e a calidade de vida na nosa cidade”, sinalou Arroxo.

Ademais, destacou que 2024 foi un “ano histórico” para o autobús urbano, alcanzando a marca de persoas usuarias desde que se gardan rexistros, con 2.219.312 billetes expedidos.