A Deputación de Lugo presentará a súa nova campaña de turismo, ‘Provincia de Lugo. Mergúllate na maxia das súas augas’, o vindeiro venres en Fitur. Trátase dunha campaña que representa a “aposta” da institución polo chamado “turismo azul” e que se enmarca no seu “modelo de promoción do territorio sustentable, de calidade e de experiencias”. Deste xeito, o presidente da Deputación lucense, José Tomé, será o encargado de dar a coñecer as novidades desta iniciativa baseada nos “camiños que a auga propón en Lugo, desde as rutas fluviais en catamarán polos canóns do Sil ata as fervenzas que regan o territorio”.
Ademais, a institución detallou nunha nota de prensa que estes recursos naturais “multiplican ata o infinito” as propostas turísticas baseadas na natureza e no deporte e que marcan tamén a gastronomía. Con todo, o presidente tamén avanzou que presentarán un vídeo promocional co obxectivo de mostrar a importancia que ten a auga. Neste sentido, Tomei participará en diferentes presentacións e actos durante a celebración de Fitur 2025 en Madrid.
