“Pista Extra”, a nova proposta do festival lucense A Candeoria amplía a súa programación para a noite do 29 de novembro. O música seguirá sendo protagonista, pero esa noite a través do audiovisual. O grupo galego Dakidarría -que tocou no último A Candeloria- estrea en Lugo o documental “Seguimos en pé” con imaxes e lembranzas exclusivas arredor da celebración do XX aniversario do grupo, que festexaron durante o 2023. Unha oportunidade única para repasar a carreira dunha das maiores bandas de Galicia e ver dende a súa ollada tanto o momento vital do grupo como da escena musical galega. A proxección contará coa presencia de membros da banda e será ás 21:00 horas no C. S. Madia leva, con entrada de balde.  

O 30 de novembro “Pista Extra” presentará unha proposta formada por grupos de rock, ska, rap ou punk que segue a estela de A Candeloria, entre os que destacan El Drogas ou  Non Servium, a banda de Móstoles xa pisou Lugo en 2018 e volven agora a presentar o tour Criatura. Ademáis, “Pista Extra” será palco de despedidas, nesta ocasión a banda Def Con Dos elixe Galicia para dar o seu último concerto da xira “Mutantes pal Pueblo”, na que repasan as cancións máis emblemáticas dos máis de 30 anos de traxectoria da banda. A nivel internacional chegará á cidade Banda Bassotti, grupo italiano de ska punk, unha das grandes bandas do xénero no seu país. Completan o cartaz os galegos Familia Caamagno; o dúo valenciano Machete en Boca; a banda Ruxe Ruxe; a “brass band” feminina Brassica Rapa e o Dj Jordi Pánico.