O Concello de Lugo ordenou a clausura das caldas do río Miño ao detectar a presenza da bacteria Legionella na zona de vestiarios durante un control rutineiro. Nun comunicado, o goberno local lugués explica que, unha vez pechados os vestiarios e toda a instalación, procederán a aplicar un “tratamento de choque e desinfección integral” de todas as dotacións do complexo.
Trasladan que os circuítos de auga “non se viron afectados” polo brote desta bacteria que obriga a cancelar as reservas previstas. A previsión é que as caldas poidan reabrir ao público “nos próximos días”. O concello tamén informou que a sesión musical programada nas actividades do Caudal Fest que ía ter lugar no complexo trasládase ao ‘Coliving’ municipal. Nas próximas horas, os técnicos municipais realizarán novas tomas de mostras e análises analíticas para avaliar a situación a través de informes que serán remitidos a sanidade para a súa validación.
