O delegado do Goberno en Galicia, Pedro Blanco, destacou a aposta do Executivo central pola “mellora da oferta turística de calidade” que representan os Paradores de Turismo da comunidade galega, con investimentos de 35 millóns de euros para a recuperación do patrimonio e mellora e coa redacción dos Plans Directores de Conservación.

Fíxoo durante a súa visita ás instalacións do Parador de Turismo de Vilalba, na que estivo acompañado pola subdelegada do Goberno na provincia, Isabel Rodríguez; a alcaldesa da localidade, Marta Rouco, e o director do establecemento, Antonio Graña.

Respecto diso, Blanco avanzou que o Ministerio de Industria adxudicou as obras de mellora e recuperación patrimonial dos Paradores de Baiona e Hostal dos Reis Católicos, por valor de 17,6 millóns de euros. Lembrou, ademais, a apertura no mes de agosto da contratación das obras de mellora dos establecementos de Vilalba, San Estevo de Ribas de Sil e Ferrol, por un importe conxunto de dous millóns de euros.

En canto ao Parador de Vilalba, o delegado detallou que as principais actuacións superan os 840.000 euros de presuposto base. Concretamente, serán traballos de rehabilitación e conservación da torre, así como melloras e renovación da iluminación da torre e do almenado con criterios de eficacia e eficiencia enerxética.