A Deputación de Lugo abriu o prazo de inscrición para participar no novo programa de actividades gratuítas co obxectivo de fomentar o lecer saudable e a educación ambiental nas reservas da biosfera Terras do Miño e Os Ancares e Montes de Cervantes, Navia e Becerreá.
O novo calendario inclúe en total 13 propostas con máis de 230 prazas para todos os públicos que se desenvolverán no terceiro trimestre do ano, do 1 de xullo ao 27 de setembro.
Os interesados poden anotarse chamando ao número de teléfono 982.305.930 e 982.227.812, enviando un correo electrónico a und.medioambiente@deputacionlugo.org no caso das actividades de Terras do Miño e ancareslucenses@deputacionlugo.org para as actividades que se desenvolven na reserva dos Ancares Lucenses e Montes de Cervantes, Navia e Becerreá. Ademais, hai un espazo virtual habilitado na páxina web da Deputación de Lugo.
OBRAS CINTO COMARCAL
Por outra banda, a institución provincial iniciou as obras de mellora dun novo tramo do Cinto Comarcal, na estrada LU-P-1611, que transcorre polos concellos de Friol, Outeiro de Rei E Begonte.
Este proxecto, que conta cun investimento superior a 700.000 euros, contempla o acondicionamento dun tramo de sete quilómetros, comprendido entre os puntos quilométricos 49 e 57.
