A Consellería de Vivenda e Planificación de Infraestruturas adxudicou por 2.302.355 euros a execución das obras de acondicionamento e mellora da estrada autonómica LU-710, desde a intersección coa N-V e ata a ligazón coa A-6, no concello de Baralla. A intervención, adxudicada á empresa Grupo Bascuas 2008, S.L., ten como obxectivo mellorar a seguridade viaria no entrono, mediante o ensanche e mellora desta vía autonómica no tramo que conecta a N-V e a A-6, nunha lonxitude de preto de 4,5 quilómetros.

Mediante estas obras, a LU-710 contará cunha plataforma ampliada a sete metros de sección, sen incluír as cunetas, cun carril por sentido de tres metros cada un e beiravías de 0,5 metros. O contrato asinarano nos próximos días co obxectivo de poder iniciar as obras no verán. Os traballos contan cun prazo de execución de 18 meses.