O incendio forestal que permanecía activo desde este domingo no municipio lucense de Guitiriz quedou extinguido sobre as 03,30 horas deste luns, cunha afectación final de 8,4 hectáreas calcinadas.
Segundo fontes de Medio Rural consultadas por Europa Press, o lume iniciouse ás 16,55 horas na parroquia de Santa Cruz de Parga. Para tratar de extinguilo, desprazáronse diferentes efectivos entre os que se atopaban tres axentes, oito brigadas, catro motobombas, unha pa, un técnico, dous avións e catro helicópteros.
A Consellería lembra que está a disposición da cidadanía o número de teléfono gratuíto 085, ao que deben chamar en caso de detectar algún incendio forestal. Ademais, existe un teléfono anónimo e gratuíto para denunciar calquera actividade delictuosa incendiaria da que se teña sospeita ou coñecemento: 900 815 085.
