O Tribunal Superior de Xustiza de Galicia (TSXG) desestimou o recurso de apelación interposto por unha muller, que foi condenada a tres anos de prisión pola Audiencia Provincial de Lugo, e ratificou dita condena, como autora dun delito continuado de estafa a unha anciá de 81 anos de idade.
Segundo a sentenza do tribunal provincial, a acusada convenceu á vítima de que necesitaba a súa axuda para facer uns trámites, e levouna a varias sucursais onde fixo que retirase diversas cantidades de diñeiro, sen que a anciá fose consciente. Así, en xullo de 2020, logrou que retirase un total de 7.000 euros dos que se apropiou; en setembro dese ano, a vítima retirou outros 8.000 euros; e en outubro, volveuna a acompañar ao banco para sacar outros 7.000 euros máis.
A acusada, que xa tiña antecedentes por estafa e falsidade en documento público, volveuno a tentar meses despois con outra vítima, unha muller de 75 anos de idade, a quen lle fixo crer que podería cederlle unha licenza (inexistente) para a venda de produtos agrícolas, e acompañouna ao banco para retirar 6.000 euros.
Nese caso, a estafa non chegou a consumarse, porque a vítima se negou a asinar o reintegro e unha empregada da sucursal deuse conta do que estaba a pasar. Por estes feitos, a Audiencia condenou á acusada a 3 anos de cárcere e a indemnizar á primeira muller en 22.000 euros máis intereses. A súa defensa presentou recurso de apelación, pero o alto tribunal galego desestimouno e confirmou a sentenza de instancia.
CONCLUSIÓN “INCONTESTABLE”
O TSXG sinala na súa resolución que non houbo erro na valoración da proba realizada pola Audiencia Provincial de Lugo e que, de feito, “a conclusión á que chega a sentenza é incontestable”. Así mesmo, expón que “o arsenal probatorio é certamente contundente” e existe suficiente proba incriminatoria para a condena da procesada.
