Nova lea entre o comité de folga dos bombeiros comarcais e a Deputación de Lugo. Os representantes dos traballadores denuncian “coaccións” por parte do organismo provincial, que este venres denunciou, por segundo día consecutivo, o incumprimento dos servizos mínimos do parque de Vilalba.

En concreto, a institución que preside o socialista José Tomé emitiu un comunicado, igual que o fixo o xoves, no que relata que só dous traballadores incorporáronse na quenda deste venres no parque da capital chairega. Ademais, “non se presentou” o outro empregado designado como suplente para cubrir os servizos mínimos. Aínda que se lle avisou de novo, así como a outros dous suplentes, ningún deles se reincorporou “transcorrida máis dunha hora”. Xunto a isto, a metade do persoal de Vilalba está de baixa.

A Deputación de Lugo acusa aos bombeiros de manter “un comportamento totalmente irresponsable” por non cumprir con “a súa obrigación de presentarse no seu posto de traballo”. Así, os dous traballadores foron desprazados ata o parque de Barreiros. Este novo comunicado do goberno provincial sucede a outro emitido o xoves no que advertía ao colectivo de bombeiros, que está en folga indefinida desde o pasado mes de xuño, que acudiría á vía xudicial “de producirse algunha consecuencia” polo que considera unha “estratexia orquestrada”.

O COMITÉ VE “AMEAZAS” E “COACCIÓNS”

Neste contexto, o comité de folga dos bombeiros comarcais enviou outro comunicado no que acusa á Deputación de “tentar condicionar o lexítimo dereito de folga” con estas “ameazas” e desvía a responsabilidade. “Son os consorcios provinciais, non nós, os que non prestan os seus servizos, pois a responsabilidade de garantir os servizos mínimos é súa, a través dun persoal que poida traballar en condicións dignas, non de precariedade nin á conta de verse obrigados a facer horas extra“, afirma o comité.

Ademais, os representantes sindicais advirten que hai tanto persoal de baixa “precisamente polas presións por parte da administración para facer extras obrigatorias, distribucións con menos de cinco días e extensións horarias excesivas, que impide a conciliación coa vida familiar”.

Para o comité, se hai “algún tipo de acusación xudicial” debería ser contra os consorcios, porque non están a prestar “con normalidade un servizo imprescindible da cidadanía”. Finalmente, advirte á Deputación de que a súa actitude “non é a máis adecuada” para pór fin ao conflito que se estende case medio ano.