O Xulgado do Penal número 1 de Lugo resolveu este venres impor unha pena de prisión de 15 meses e un día a unha condutora acusada de atropelar baixo os efectos do alcol a dúas persoas na parroquia de Oleiros (Vilalba), uns feitos ocorridos en agosto de 2019. As partes chegaron a un acordo de conformidade respecto da responsabilidade penal da acusada, que recoñeceu os feitos e que non poderá conducir vehículos a motor ou ciclomotores por un período de dous anos, seis meses e un día.
Os feitos tiveron lugar na madrugada do 11 de agosto de 2019, á altura do punto quilométrico 3,700 da estrada LU-P-6510, no termo Municipal de Vilalba, cando a acusada, de acordo ao recolleito no escrito fiscal, arroiou co seu vehículo a dous transeúntes que camiñaban pola marxe dereita da vía. A proba de detección alcohólica realizada á moza arroxou un resultado positivo de 0,77 miligramos de alcol por litro en aire expirado, o que abriu o procedemento por un delito contra a seguridade do tráfico en concurso con dous delitos de lesións por imprudencia grave.
DISCREPANCIAS SOBRE A RESPONSABILIDADE CIVIL
A vista oral celebrada este venres, que se estendeu durante case dúas horas, estivo centrada en dirimir a responsabilidade civil da procesada, para quen a acusación particular solicitou unha indemnización conxunta próxima aos 90.000 euros polas lesións sufridas polos dous transeúntes e as consecuentes secuelas provocadas.
No xuízo tomouse declaración á acusada; a varias testemuñas presenciais; aos axentes da Garda Civil encargados de elaborar o ateigado; aos efectivos da Policía Local que se personaron no lugar do sinistro; a un perito e a un médico forense. A acusación particular reclamou na fase de conclusións o pago de 37.000 e 49.000 euros de indemnización ás dúas vítimas do atropelo en concepto de responsabilidade civil polos prexuízos físicos e morais causados, así como os gastos médicos e farmacolóxicos asociados a estes.
A defensa, pola súa banda, e o letrado da compañía aseguradora, pediron o 50 % de aminoración da responsabilidade civil ao argumentar que os peóns cometeron tamén unha “imprudencia” ao camiñar pola beiravía dereita da estrada e sen dispositivos reflectores nunha vía que carecía de iluminación artificial.
