O Grupo Municipal do PP de Vilalba reuniuse estes días con traballadores da empresa encargada do servizo de recollida de lixo e limpeza viaria para coñecer a súa situación tras varias xornadas en folga.
Para os populares, esta situación é “consecuencia da incompetencia e da falta de xestión” por parte do goberno local, que “leva practicamente tres anos sen renovar o contrato do servizo, caducado a finais de setembro do 2020, nin facer un control sobre a súa prestación pola anterior concesionaria”.
Os populares urxen, por tanto, aos responsables do goberno bipartito a “dar unha solución inmediata e definitiva a este conflito que non se debería dar o seu fixesen o seu traballo”, clamaron.
O PP de Vilalba condena “a falta de palabra do PSOE” e lembrou que solicitaron “en numerosas ocasións” ao goberno local que “licitase un novo contrato para prestar o servizo desde unha situación de legalidade”. “Tras tres anos sen contrato entre o Concello e a empresa, os traballadores sofren as consecuencias ante un goberno local encabezado polo Partido Socialista que non é sensible coa súa situación, destaca a portavoz, Sandra López.
