O Parque de Bombeiros de Lugo sumou 10 novos profesionais interinos despois de superar o proceso de oposición libre. Con estas novas incorporacións, o equipo da capital lucense conta con 54 bombeiros.

Na toma de posesión destes 10 novos bombeiros estivo a alcaldesa da cidade, Lara Méndez, que avanzou que nos próximos días tomarán posesión dous novos bombeiros en réxime interino.

Ademais, segundo trasladou o Concello, Méndez encomiou o esforzo realizado polos novos interinos e deulles a benvida a “un servizo moi querido pola sociedade lucense”. “Estamos seguros de que o voso traballo estará á altura das expectativas”, manifestou.

Do mesmo xeito, Lara Méndez informou de que a xunta de goberno local desta semana aprobará incluír dúas prazas na OPE de 2024, en previsión da xubilación de dous bombeiros neste exercicio.