O Belén de Begonte, que este ano cumpre o seu 50 aniversario, superou esta semana as 20.000 visitas desde que abriu as súas portas o primeiro sábado deste mes de decembro, tal e como informou o centro cultural José Domínguez Guizán.
Todo iso, a pesar de que ata o pasado sábado, 24 de decembro, tan só puido ser visitado os sábados, domingos e festivos. Segundo sinalou o centro cultural José Domínguez Guizán, a media de asistentes cada día de apertura superou as 1.000 persoas, habendo visitantes formando cola á hora de apertura e tendo que prolongar o seu funcionamento máis aló da hora de peche fixada.
Así mesmo, os organizadores do Belén de Begonte quixeron agradecer a todos os visitantes a “paciencia demostrada” cando se produciron colas e o seu “correcto comportamento” en todo momento.
