O alcalde da Fonsagrada, Carlos López, aínda “afónico”, confía que a “choiva de millóns” que deixou o Gordo da lotaría de Nadal, 180 millóns de euros, repercuta no municipio.
Un día despois confesou que a afonía lle vén de “cantar e de estar coa xente”. Xa a xornada deste venres vívea con máis “tranquilidade”. “O día despois vén máis tranquilo. Os veciños están moi contentos. Agora toca esperar que esta choiva de millóns repercuta na Fonsagrada”, celebrou.
Carlos López puxo de manifesto que os veciños están “encantados” e que moitos deles tratan de pescudar a quen lle “tocou”. “Tocase ou non tocase, todos estamos moi contentos”, subscribe o alcalde.
O rexedor fonsagradino augurou que “o tema da vivenda vai subir en canto á compra de pisos, isto vaise a traducir en ingresos para a localidade, ademais da publicidade que se deu da Fonsagrada”. Neste municipio da montaña de Lugo, de pouco máis de tres mil habitantes, vendéronse 45 series do primeiro premio, o 5.490, que se traduce en 180 millóns de euros.
