O belén electrónico de Begonte cumpre medio século nunha edición que será inaugurada este venres e que poderá visitarse desde o sábado ata o 28 de xaneiro.
Unha antiga escola dá acubillo a unha mostra composta por máis de cen pezas, a maioría delas en movemento, e que conta cunha tradición de medio século desde o seu nacemento en 1972 baixo a iniciativa do párroco José Domínguez Guizán e de José Rodríguez Varela.
O vicepresidente da asociación que organiza cada ano o belén e que leva o nome do seu promotor, Xulio Xiz, lembrou que o 50 aniversario é unha efeméride que desexan “celebrar ao grande”.
Por iso, antes da súa apertura ao público xeral, este venres terá lugar unha inauguración oficial á que está previsto que acuda o presidente da Xunta, Alfonso Rueda.
A partir do sábado poderá visitarse en horarios de mañá –de 11,00 a 13,00 horas– e de tarde –de 16,00 a 19,00 horas–. As visitas durarán uns 15 minutos, “con grupos de sesenta ou setenta persoas”.
