Lugo contará este verán cunha zona de baño Pública no Miño. A Xunta de Goberno Local adxudicará este mércores a súa instalación á empresa Yacht Port Marinas S.L que disporá dun prazo de doce semanas para proceder á súa subministración. A actuación, cofinanciada pola Deputación Provincial, terá un custo de 304.920 euros.
A zona de baño estará ubicada en pleno cinturón verde da capital, a altura da Tolda de Castela. Unha localización que a rexedora Lara Méndez considerou idónea, logo das conclusións do estudo de alternativas elaborado e da batimetría realizada. “Trátase dunha estrutura flotante, de 64 metros de lonxitude, baseada nun sistema modular, que terá carácter temporal xa que estará operativa tres meses ao ano, e que se destinará a zona de baño tanto para adultos como tamén para crianzas”, lembrou.
A dotación, inspirada no deseño da exitosa enseada de La Villete de París, estará composta por varias seccións. Por unha banda, unha estrutura superior, que servirá como zona de estancia, repouso e para acceso ás piscinas.
Estará construída mediante cubos flotantes debidamente ensamblados e aparafusados, o que lle conferirá unha gran flotabilidade e nulo risco para as persoas usuarias. E, pola outra, contémplase a creación de catro piscinas de distintas características, con superficies útiles de 1’20 m., 0’80 m., e dúas de 0’40 m., cumprindo así coas expectativas en canto a público infantil, xa que cada unha delas estará delimitada para un rango de idade determinado.
Por outra parte, o acceso a terra se realizará mediante unha pasarela, construída no mesmo material de cubos e que irá ensamblada conformando un todo homoxéneo, mentres que a zona de terra se acondicionará con laxas xa existentes nesa zona, de maneira que o impacto visual será nulo.
A Administración local contempla ademáis a dotación de vestiarios e aseos nas inmediacións para incrementar as prestacións da nova dotación que contará, igualmente, con servizo de socorristas. A maiores, o Concello proxecta a mellora do parque infantil sito nas proximidades, incrementando, así, o atractivo da contorna.
