A conselleira de Medio Ambiente, Territorio e Vivenda, Ángeles Vázquez, destacou a aposta do concello de Outeiro de Rei pola reciclaxe e a economía circular a través da posta en marcha dun novo espazo municipal para a autorreparación e o intercambio de obxectos e utensilios que foi financiado ao 80% pola Xunta con 30.000 euros.

Así, trátase dun espazo que permitirá recuperar utensilios depositados no punto limpo da localidade ou obxectos que outras persoas achegar á instalación para intercambialos por outros do seu interese, xa sexan mobles, roupa, pequenos electrodomésticos ou xoguetes.

Na súa visita deste luns, Vázquez lembrou que o obxecto do seu departamento é apoiar aos concellos en proxectos deste tipo e contribuír a unha mellor e máis ampla xestión dos residuos.

Este espazo de autorreparación está localizado nunha nave do polígono industrial da localidade luguesa e conta cunha superficie útil de 60,26 metros cadrados distribuídos nunha soa planta e con altura suficiente para facilitar a entrada de vehículos. Ademais, está situado á beira do punto limpo e con acceso directo ao mesmo.