A Policía Local de Lugo localizou durmido na súa vivenda co televisor aceso e o teléfono móbil en silencio a un octoxenario co que a súa familia non lograba contactar.
Segundo relatou a Policía Local, sobre as 00,55 horas do pasado 9 de xaneiro unha patrulla do Grupo Operativo Nocturno foi enviada a un edificio da Rolda da Muralla porque unha persoa estaba preocupada pois chamaba a un familiar ao seu móbil e á porta da súa vivenda pero non contestaba.
O requirente do servizo, ao temer que “algo grave lle puidese pasar”, sinalan as mesmas fontes, indicou que o seu familiar estaba dentro e, aínda que tiña a chave, non podía acceder ao interior porque a porta estaba pechada con chave dentro da fechadura.
Finalmente, para comprobar o estado desta persoa de idade avanzada, accederon ao interior da vivenda e constataron que o home, de 80 anos, estaba durmido no seu cuarto, “en perfecto estado”, sostén a Policía Local, co televisor aceso e o móbil en silencio. Aínda que fora requirida unha ambulancia do 061, non foi necesaria a súa intervención.
