A Policía Local de Lugo tramitou 14 actas de denuncia a sete locais de lecer nocturno desta cidade durante as noites do pasado venres e sábado por non requirir o certificado Covid, non rexistrar clientes ou incumprir o horario de peche.
Segundo informou a Policía Local de Lugo, durante as noites do venres e sábado pasados efectivos do Grupo Operativo Nocturno estableceron un dispositivo especial para o control do cumprimento da normativa Covid, no que foron realizadas 14 actas de denuncia por infraccións á Lei de Saúde de Galicia.
En concreto, tramitaron seis actas de denuncia por non requirir aos clientes a presentación dun certificado Covid, unha proba diagnóstica realizadas nas últimas 72 horas ou un certificado de recuperación.
A elas súmanse seis denuncias por non rexistrar aos clientes que accedían ao local e outras dúas actas por quebrantar o horario de peche establecido para eses establecementos. Por cada unha destas infraccións, puntualizan as mesmas fontes municipais, os axentes propuxeron sanción de 500 euros.
