A Xunta concede ao Campus Terra de Lugo, dependente da Universidade de Santiago de Compostela (USC), a acreditación de centro especializado nas áreas de agricultura, gandaría e sector forestal sustentables.
O Diario Oficial de Galicia recolle este mércores esta distinción coa máxima cualificación. Significa que se manterá, de entrada, durante un período de catro anos en continúa revisión por un comité avaliador.
O conselleiro de Cultura, Educación e Universidade, Román Rodríguez e o reitor da USC, Antonio López, presentaron este selo de calidade que leva un apoio económico “a maiores” que se abordará nun convenio entre ambas as institucións. Este recoñecemento de especialización en determinadas áreas foi outorgado no seu día ao Campus Industrial de Ferrol.
O propósito é “pór en valor os campus non centrais a través dunha identidade propia relacionada coa súa contorna, á vez que se converten en impulsores da investigación e do desenvolvemento económico”, declarou Román Rodríguez.
Segundo explica a Xunta, esta estratexia dirixida ao Campus Terra de Lugo foi iniciada “polo Goberno galego en 2013”.
Agora permítelle “converterse en referente científico e social en aspectos como a produción vexetal, agricultura sustentable, produción e saúde animal, alimentación segura e saudable e a xestión forestal sustentable”, apuntaron a Consellería.
