O secretario en Lugo de CIG-Saúde, David Vázquez, confirmou que seguen “pendentes” da denuncia que formularon ante a Inspección de Traballo por non dispor, determinado persoal sanitario, de “equipos de protección“ fronte á Covid-19.

A denuncia foi presentada, explicou, fundamentalmente porque o Sergas non distribuíu a todo o persoal sanitario máscaras de protección FFP2, que nalgúns casos teñen que ser os propios traballadores os que as teñan que comprar.

“Non se está proporcionando esa protección e por iso denunciouse ante a Inspección de Traballo. A denuncia segue o seu curso e veremos en que acaba”, advertiu. Así mesmo, tamén censurou que non se estea aplicando o “plan de continxencia”, que non asinou a CIG, polo cal se recollen tres días de permiso para o persoal que traballa en primeira liña contra a Covid.

“As distintas xerencias están a denegalo (o permiso, que tamén comprendería a Atención Primaria) porque non cumpren os requisitos que marcan as instrucións da Dirección Xeral de Recursos Humanos”, afeou finalmente.