EFE | O xerente da área sanitaria de Lugo, A Mariña e Monforte de Lemos, Ramón Ares, confirmou que a presión asistencial se mantén “estable” a pesar de que durante a fin de semana aumentaron os ingresos. Asegura que o HULA aínda “ten capacidade” para atender pacientes derivados doutras áreas sanitarias.

Nestes momentos, no HULA hai 43 pacientes ingresados en planta e outros 18 na unidade de críticos. “Durante a fin de semana houbo algunha alta de UCI, pacientes que pasaron a planta” precisou Ares, quen lembrou que en Galicia o sistema sanitario está a funcionar coma se se tratase dun único hospital, así que o HULA neste momento podería seguir recibindo pacientes doutras áreas por ter unha menor presión asistencial ca outros centros.

De momento, aclarou, só foron derivados enfermos da área sanitaria de Ferrol, porque alí a presión asistencial é maior e, desta forma, conséguese que o sistema poida funcionar nesa zona con maior normalidade.