EFE | A Asociación Provincial de Empresarios de Hostalería e Turismo de Lugo (Apehl) deseñou a “campaña Regálal…E Regálat…E”, coa que pretende “incentivar a venda de experiencias gastronómicas e turísticas como agasallo para este nadal”.

O presidente da asociación, Cheché Real, afirmou que a Apehl segue “traballando por e para o sector co fin de superar esta etapa tan difícil para os negocios de hostalería e turismo da provincia”. Así, esta iniciativa ofrece aos clientes “a posibilidade de comprar gastronomía, consumicións, estancias en hoteis, turismo rural e experiencias turísticas nos establecementos que participen”.

“É un bo atractivo para clientes particulares e tamén unha boa idea para empresas, que poden substituir os seus obsequios do Nadal por este tipo de agasallos para os seus traballadores”, afirma Real.

Os locais adheridos á campaña terán un cartel identificativo como establecemento participante e dispoñerán uns tickets agasallo que se encherán en función da compra dos seus clientes. A lista dos establecementos participantes pódese consultar na web da asociación e a campaña desenvolverase do 18 de decembro ao 10 de xaneiro. “Este nadal imos regalar…E para comer, Lugo”, destaca Cheché Real.