Aínda que o total de casos activos por coronavirus na área sanitaria de Lugo segue en descenso, este mércores 9 de decembro rexístrase unha repunta nas hospitalizacións e nos novos positivos detectados. Así, segundo o reconto do Sergas, hai 606 pacientes con infección activa (18 menos ca os contabilizados onte), pero confirmáronse 31 casos novos a través de PCR nas últimas 24 horas (onte foran 16).
Así mesmo, tamén aumentou a presión asistencial, ao constar 30 hospitalizacións (cinco máis). En concreto, o Hospital Universitario Lucus Augusti (HULA) atende tres pacientes na UCI (+1) e 21 en planta; o da Mariña, dous; e o de Monforte, catro.
No histórico da provincia, contabilízanse 137 vítimas mortais da pandemia. A última foi un nonaxenario da residencia de Vilalba que faleceu no HULA.
Por outra banda, ata o momento curáronse 5.788 pacientes (déronse 47 altas dende a anterior actualización de datos) e fixéronse 108.268 PCR.
