EFE | Unha pelexa entre dous menores, un de orixe alxerina e o outro venezolano, por mor dun suposto insulto racista proferido polo adolescente suramericano, acabou con denuncias cruzadas por parte dos pais de ambos e coas dilixencias correspondentes en mans da Fiscalía de Menores.
Segundo informaron a EFE fontes do Corpo Nacional de Polícia, a pelexa entre os dous rapaces produciuse ás portas do CEIP Luís Pimentel, na zona da Piringalla, supostamente cando o menor venezolano lle chamou “mouro” ao outro. Ao esixirlle este explicacións, deulle unha labazada.
Ambos foron separados e evitouse que a disputa fose a máis, pero despois os pais de ambos adolescentes presentaron denuncias cruzadas ante o Corpo Nacional de Policía. Tras recoller o testemuño das persoas que alí estaban e de tomarlles declaración a ambos os implicados, as dilixencias quedaron en mans da Fiscalía de Menores de Lugo.
