EFE | Comeza esta mañá na Audiencia Provincial de Lugo o xuízo dunha das pezas separadas da Operación Carioca, en concreto a relativa ao sucedido no Club Eros. O Ministerio Fiscal pide para o propietario deste local, M.G.A., unha pena de 26 anos de cárcere polos delitos de inmigración ilegal, prostitución, contra os dereitos dos traballadores e tenencia ilícita de armas.
O xuízo que comeza hoxe prolongarase ata o venres desta semana, 13 de novembro, e está previsto que continúe os días 16 e 18 da próxima.
Segundo o escrito de acusación, o administrador e propietario do club Eros contactaba con mulleres estranxeiras en situación económica moi precaria e pagáballes a viaxe a España, onde as obrigaba a prostituírse nos seus locais. Por iso, o ministerio público tamén pide que o acusado abone indemnizacións de entre 3.000 e 4.000 euros ás cinco mulleres que figuran neste proceso como testemuñas protexidas.
Os feitos que serán xulgados remóntanse ao período comprendido entre os anos 2006 e 2009. O fiscal mantén que as mulleres obrigadas a prostituírse soportaban unhas condicións moi duras, dado que “carecían de calquera dereito inherente á actividade laboral, ao non ter contrato de traballo, nin seguros médicos. Descansaban unicamente un día á semana” e “en caso de chegar tarde ou de ausencia”, impoñíaselles “unha multa”.
“Durante a menstruación” podían descansar “tres ou catro” xornadas, pero “o resto de días” víanse obrigadas a traballar”, para o que utilizaban “se era necesario, esponxas vaxinais que vendían no club”.
Ademais, durante a entrada e rexistro no club Eros e no domicilio do acusado, decretada o 16 de outubro de 2009 por Xulgado de Instrución número 1, foron achadas por parte dos axentes encargados da operación dúas pistolas con munición.
