O concello lugués de Meira e outros municipios da zona rexistran un brote de covid-19 que nestes momentos ten 18 casos activos, segundo as cifras ofrecidas este venres polo tenente de alcalde de Meira, Agustín Méndez.

No entanto, segundo o responsable local, a Consellería de Sanidade dá a situación por “controlada” ao estabilizarse o número de persoas contaxiadas, que permanece en 18 desde “principios de semana”.

“O que nos transmiten (desde Sanidade) é tranquilidade e seguir respectando as medidas que hai impostas. Esperamos que quede aí ese brote”, expresou Agustín Méndez, que destacou a implicación dos veciños para frear a expansión do brote.

“(Os veciños) Non se moveron tanto, están a ser coidadosos e con moito respecto. A vida continúa, temos que seguir movéndonos coas medidas que hai que tomar”, sentenciou.