Efectivos da Unidade Territorial de Policía de Barrio da Policía Local de Lugo denunciaron un local de hostalaría da Milagrosa e a outros dous cidadáns por incumprir as medidas sanitarias impostas, segundo informa o consistorio.

As denuncias efectuáronse o luns dentro dos dispositivos para o control do cumprimento das medidas de prevención establecidas pola Xunta de Galicia como consecuencia da evolución da situación epidemiolóxica derivada da COVID-19.

En concreto, formuláronse tres actas de infracción, das que dúas foron denuncias a cidadáns que transitaban pola vía pública sen facer uso da máscara de protección.

A terceira denuncia foi realizada á responsable dun establecemento de hostalaría situado dentro do barrio da Milagrosa, na rúa Mallorca, ao sorprender os axentes a tres clientes no interior do local, con licenza de café-bar, consumindo bebidas, a pesar das restricións impostas pola Xunta.

Respecto diso, a Policía Local lembra que no ámbito territorial delimitado pola Avenida da Coruña e as rúas Tino Grandio, Camiño Real, Mar Cantábrico e Angelo Colocci “os restaurantes non poderán superar o 50% da súa capacidade na zona de comedor para o servizo de comida e nos bares e cafetarías non se poderá consumir no interior do local”.