A conselleira de Infraestruturas e Mobilidade, Ethel Vázquez, pediu este venres a convocatoria dunha reunión “canto antes” co Goberno central e o Concello de Lugo para negociar os puntos nos que non hai acordo para a construción da estación intermodal da cidade, como é o do financiamento.
Durante a súa visita á cidade, Vázquez manifestou, en declaracións aos medios, que para lograr acordos “hai que empezar polo principio”, que é pactar o financiamento que achegará cada parte. En calquera caso, considerou que avanzar no proxecto “non tería sentido sen un cronograma claro sobre a chegada da alta velocidade a Lugo”.
“É difícil que chegue a Ourense en 2021, máis difícil é que chegue a Lugo”, dixo e sinalou que, polo que ela sabe, as obras non están en marcha. Así, insistiu en abordar a chegada do AVE e a intermodal “conxuntamente”.
O resto de estacións intermodais de Galicia, agregou, son “o resultado dunha traxectoria de colaboración e traballo conxunto” co Goberno central e varias delas atópanse na actualidade en execución.
En canto á rolda este de Lugo, Vázquez asegurou que o proxecto se licitará este ano, como se comprometeu a Xunta, e sinalou que “hai unha partida orzamentaria concreta”. “Ninguén pode dubidar de todos os investimentos da Xunta en Lugo”, defendeu.
POSTURA DO CONCELLO
Pola súa banda, o Concello mostrouse “sorprendido” por estas declaracións da titular de Infraestruras e asegurou que os equipos técnicos do tres administracións implicadas na intermodal (Adif, Xunta e Concello) “levan meses traballando nos proxectos de forma consensuada”.
A última reunión técnica foi o 5 de marzo, agregou, e nela tratáronse unicamente temas de carácter técnico e excluíuse o convenio da mesma “a petición expresa” da Xunta por ser época preelectoral. Ademais, indicou que hai unha proposta inicial de convenio sobre a que se traballa e á que se lle foron facendo achegas.
Unha vez pasadas as eleccións, este mesmo mes, a presidenta de Adif, Isabel Pardo de Vera, indicoulle á alcaldesa, Lara Méndez, que convocará unha nova reunión “en breve”, información que a rexedora lle trasladou á conselleira este venres.
O Concello pediu un “compromiso expreso” da Xunta para avanzar na intermodal, posto que Lugo “é a cidade galega que vai con máis atraso”. Tamén expresou as súas dúbidas sobre que a rolda este se vaia a licitar este ano, posto que “aínda non hai unha redacción do proxecto, nin itinerario fixado nin expropiacións resoltas”.
