Os casos activos de COVID-19 en Galicia incrementáronse en 146 máis nas últimas horas, ata alcanzar os 2.452, segundo os datos actualizados que deu a coñecer este luns a Consellería de Sanidade.
Así, o Sergas confirmou que a área sanitaria da Coruña mantense como a máis afectada, con 1.236 casos (29 máis que hai 24 horas), seguida pola área de Lugo, con 321 casos (17 máis) e a de Santiago, con 274 casos rexistrados (62 máis). Na área sanitaria de Ourense, este luns notificáronse 212 casos (9 máis); outros 155 na área de Vigo (un máis); 141 casos na área de Pontevedra (21 máis); e 113 casos activos na área de Ferrol (7 máis).
Sanidade confirmou tamén o aumento de pacientes hospitalizados, que pasa de 76 a 82. Deles, o número de afectados que se atopan ingresados en UCI subiu a 12 (dúas máis) e tamén aumentou o número de casos en unidades de hospitalización, pasando de 66 a 70.
Desde o inicio da pandemia, morreron con COVID-19 en Galicia 633 persoas, das que case o 44 por cento, 278 persoas, eran usuarios de centros residenciais. Destes últimos, 134 afectados faleceron dentro dos propios centros xeriátricos.
Por outra banda, realizáronse ata o momento 305.847 probas PCR (máis de 3.000 nas últimas horas) e curáronse 11.956 persoas, o que supón 67 novas altas epidemiolóxicas desde o domingo.
