Lugo contará cunha nova senda verde para bicicletas con 14 quilómetros en total. A alcaldesa, Lara Méndez, anunciou este martes este proxecto que terá o obxectivo de avanzar cara a “un modelo de cidade máis sustentable”.

A rexedora socialista expresou que a capital provincial “ten que dar pasos” cara ao uso dun medio de transporte “limpo e saudable” como a bicicleta. Este carril é un dos proxectos incluídos na estratexia ‘Muramiñae’, que busca unir a cidade co río Miño. Neste sentido, Méndez explicou que a iniciativa pretende “deixar de vivir de costas ao río” e conectar Lugo “de leste a oeste e de norte a sur”.

En concreto, o novo carril verde pasará por oito barrios da cidade que están integrados en ‘Muramiñae’: Paseo do Miño, Parque Rosalía, Ronda do Carme, Fonte dos Ranchos, Lamas de Prado, Abella, A Residencia e Camiño Real. Contará con revestimentos de cor verde e de pavimento antideslizante, ademais de interseccións en vermello.

E OS COCHES?

Ademais da senda para bicicletas, haberá “carrís de coexistencia” con vehículos e zonas de velocidade reducida —a 30 quilómetros por hora—, todo iso con separadores para a seguridade de peóns, ciclistas e condutores.

Así mesmo, as prazas de aparcadoiro sufrirán “algunhas modificacións”, dixo a alcaldesa, para tentar que a nova medida sexa “o menos gravosa posible” para os residentes das rúas que se vexan afectadas. Así, o Concello expón crear dúas zonas de aparcadoiro, unha para 16 coches e outra para máis de 50. Tamén se “mellorará” o firme das vías máis danadas da cidade, haberá zonas de aparcar as bicicletas e catro bancos de recarga para bicicletas eléctricas e móbiles.

INVESTIMENTO

Estas actuacións na capital provincial están financiadas nun 80 por cento con fondos europeos e suma un total de 1,6 millóns de euros, aos que hai que engadir outros 200.000 dos novos aparcadoiros. O prazo de execución será de seis meses, despois de que a xunta de goberno local aprobe o vindeiro xoves o proxecto de licitación.