EFE | Se ben o Concello de Lugo restrinxiu temporalmente o tráfico rodado a un só carril da Rolda da Muralla durante a desescalada, as intencións son as de ir convertendo esa medida en permanente. Así o anunciou o tenente de alcalde de Lugo e responsable da área de Mobilidade, Rubén Arroxo, nun encontro dixital con xornalistas.
Arroxo confesou que a idea do goberno local é volver “permanente” esa peonalización parcial da Rolda da Muralla e están dispostos, din, a realizar as obras precisas para que Lugo teña un paseo peonil de 2’5 quilómetros arredor de todo o monumento romano.
Así, quedou confirmada a peonalización total doutros dous tramos da Rolda: o da Mosqueira e o que discorre entre a rúa Santiago e a rúa Vilalba, actuacións que o propio tenente de alcalde anunciou para os vindeiros meses.
“Desde a área de Mobilidade xa iniciamos o proceso para peonalizar por completo o tramo da Mosqueira” e “comezaremos a facer obras para cambiar o pavimento entre a Porta de Santiago e a Rúa Vilalba”, precisou. Desta maneira, as beirarrúas ocuparán todo o espazo do carril interior dende a Porta de Santiago ata a Porta de San Pedro.
