O parque móbil da Deputación de Lugo, Vías e Obras e a Granxa Gayoso Castro volven este luns á normalidade cun plan específico que garanta a seguridade no traballo presencial dos empregados públicos.

A deputada de Réxime Interior do organismo provincial, Pilar García Porto, avanzou a elaboración de plans de protección para as diferentes dependencias do ente provincial. Con este obxectivo a Deputación de Lugo busca unha desescalada progresiva cara a unha “nova normalidade”, sinalou. A institución provincial mostrouse lista para afrontar a incorporación gradual e progresiva ao traballo presencial, algo que se fará no momento en que os responsables sanitarios o fixen.

Estes plans de protección serven para que os traballadores poidan desenvolver o seu traballo presencial, con plenas garantías, durante o estado de alarma cando sexa preciso, indicaron as mesmas fontes.

Así, os empregados públicos coñecerán con antelación e tempo suficiente as pautas de actuación e organización para desenvolver con seguridade as súas funcións nos diferentes centros de traballo.

Ademais, entregaráselle ao persoal equipos de protección individual adaptados ás características do labor que realizan. Recoméndase, tamén, que os traballadores acudan aos seus postos de traballo en transporte privado e refórzase a limpeza en todas as instalacións.