O Concello de Lugo aprobou, nunha xunta de goberno celebrada de forma telemática, o expediente para a construción da pasarela sobre a estrada N-VI, licitada o pasado mes de febreiro.
A empresa adxudicataria trasladou a súa conformidade ao Concello para iniciar, o máis axiña posible, as obras desta pasarela moi demandada por todos os lucenses, sobre todo por aqueles afeccionados ao fútbol que teñen que cruzar a estrada nacional cada vez que acoden ao estadio Anxo Carro para ver os partidos do Club Deportivo Lugo.
A rexedora lucense, Lara Méndez, manifestou “o firme compromiso” do goberno local de renovar toda a actividade en canto sexa viable. Segundo Méndez, este é só un dos exemplos que corroboran que, desde o Consistorio, está “a desenvolverse sen descanso un intenso labor administrativo” que permitirá concluír procesos “transcendentais” para a cidade lucense.
O MERCADONA EN INFANTA ELENA
Ademais, na sesión deste xoves deuse o visto e prace a un total de 17 licenzas urbanísticas co obxectivo, segundo a rexedora, “de que o sector da construción poida avanzar tamén na súa recuperación”.
Entre os expedientes máis destacados, figura a creación dun supermercado, da compañía Mercadona, na Avenida Infanta Elena, cun orzamento de dous millóns e medio de euros. Tamén se contempla a ampliación doutra superficie comercial na Avenida da Coruña por valor de máis dun millón de euros.
En materia de persoal validáronse as propostas para o nomeamento de sete prazas de Policía Local, catro por concurso interadministrativo e outro tres de oposición libre.
