A área sanitaria de Lugo rexistra unha nova baixada —moi lixeira— no número total de casos activos por coronavirus, ata situarse nos 589 positivos fronte aos 590 do pasado martes. Na outra banda, volve subir a cifra de mortes pola COVID-19 ao falecer unha octoxenaria usuaria da residencia de Foz.

Esta interna era a única con coronavirus que permanecía no xeriátrico, despois de que tres residentes con positivo fosen trasladados á residencia Porta do Camiño (Santiago de Compostela) e unha evacuada ao Hospital Virxe dos Ollos Grandes de Lugo. A finada estaba illada nunha habitación, pois o Sergas descartara o seu traslado ao Hospital Público da Mariña, segundo o equipo directivo da empresa xestora, Clece.

GALICIA

Pola súa parte, a Dirección Xeral de Saúde Pública da Consellería de Sanidade informa de que o número de casos activos en Galicia ascende a 6.019, isto é, 46 máis ca no día de onte. A comunidade xa rexistrou 391 falecementos e 1.298 altas. Podes ler máis información no Galicia Confidencial.