Un home de 81 anos de idade que estaba ingresado no Hospital Lucus Augusti de Lugo é a última vítima mortal relacionada coa pandemia de coronavirus en Galicia, cuxo balance de mortes se eleva a 19. Na provincia de Lugo, este é o segundo falecemento relacionado co Covid-19, despois de que a semana pasada finase un chantadés ingresado en Monforte.

Segundo informan as autoridades sanitarias, este home fora diagnosticado de coronavirus e presentaba patoloxías previas.

DATOS

En base aos datos publicados esta mañá polo Sergas, o número de diagnosticados na área de Lugo aumentou en catro persoas, respecto do rexistrado onte. Así, suman un total de 62 diagnósticos.

O total galego ascende a 1.170, dos cales 298 son da área da Coruña, 142 da de Ourense, 164 da de Pontevedra, 278 da área de Vigo, 189 da de Santiago de Compostela, e 37 da de Ferrol.

Do total de pacientes positivos, 46 permanecen en Unidade de Coidados Intensivos (UCI), 270 están en unidades de hospitalización e 854 no domicilio. Polo de agora, en Galicia rexistráronse 19 altas de pacientes e 19 falecementos.