As obras de rehabilitación na autovía A-6, comezadas este luns, provocarán restricións ao tráfico á altura do municipio de Outeiro de Rei durante todo o mes de marzo.
Segundo informa este luns o Ministerio de Transportes, Mobilidade e Axenda Urbana nun comunicado, o tráfico quedará habilitado a través dun carril ao longo deste mes. Ademais, a súa operatividade quedará suxeita ás condicións meteorolóxicas.
Os tramos afectados son os comprendidos entre os quilómetros 505’500 a 512’000 -contorna de Outeiro- en sentido A Coruña; e entre os quilómetros 539’000 á 540’000 -ligazón coa N-634 en Guitiriz- en dirección Madrid. Deste xeito, durante as obras quedarán cortado o tráfico no carril afectado, que será maioritariamente o dereito, segundo apunta o Goberno central.
Os traballos consisten en rehabilitar a superficie do firme de cara a mellorar a seguridade e comodidade dos usuarios.
