A Deputación de Lugo vén de aprobar o convenio marco para poñer en marcha o programa ‘Lugo, provincia cardioprotexida’, unha iniciativa a través da cal o ente provincial dotará de desfibrilidores semiautomáticos a 49 concellos e promoverá a formación de persoal municipal para o seu manexo.

Segundo resaltou o presidente da Deputación, José Tomé, en rolda de prensa, a idea é mellorar a protección da veciñanza ante posibles fallos cardíacos. É unha medida “que vai na liña do que recomendan as organizacións de profesionais sanitarios”, indicou. E é que, en caso de parada cardiorespiratoria, a atención inmediata é vital: cada minuto que pasa, a probabilidade de supervivencia diminúe nun 10%, polo que cómpre establecer mecanismos que favorezan unha redución dos tempos de resposta.

Así pois, unha vez aprobado o convenio marco para pór en marcha este programa, débese asinar un acordo de colaboración con cada un dos concellos que se adheriron a el. Será entón cando estes designen as persoas que reciban a formación e cando se inicie o procedemento para a contratación conxunta do subministro dos desfibriladores. A previsión é que este programa estea en funcionamento antes de que remate o ano.

ONDE ESTARÁN OS DESFIBRILADORES?

Serán os propios concellos os que decidan en que instalación municipal colocan os aparellos: os consistorios, pavillóns deportivos, centros sociais ou casas da cultura serían lugares de utilidade, por exemplo. Os concellos ocuparanse da instalación do equipamento e deberán adscribir o persoal necesario para o seu manexo, así como asumir os gastos de mantemento. Pola súa banda, a Deputación investirá 60.000 euros para financiar os custos de contratación e formación de persoal.