A xunta de goberno da Deputación de Lugo activou este mércores o plan ‘Prende! Bota raíces no rural’, co que busca a creación de emprego xuvenil e fixar poboación na zona rural da provincia, como unha medida para frear o despoboamento e o envellecemento das súas aldeas.
O órgano de goberno da institución provincial aprobou as bases desta iniciativa, de modo que a próxima semana, unha vez que estean publicadas na Base de Datos Nacional de Subvencións e no Boletín Oficial da Provincia, quedará aberto o prazo de inscrición para a fase de formación.
Segundo informou o goberno provincial, as persoas participantes recibirán formación e experiencia laboral en actividades “cun importante peso no sector produtivo da provincia e cun gran potencial de crecemento”, como poden ser as enerxías renovables, turismo, xestión forestal, agricultura ou gandaría.
O período de formación prolongarase durante catro semanas e os participantes percibirán nese tempo unha prestación de 14 euros por día; mentres que na fase de prácticas, que durará oito meses, cobrarán un salario mensual de, como mínimo, 900 euros -para o que as empresas participantes recibirán unha axuda de 4.410 euros-.
Ademais, a todos aqueles participantes que estean interesados en emprender o seu propio negocio, a Deputación axudaraos “a arrincar” cunha axuda de 5.510 euros. En principio, está previsto que un total de 60 mozos se beneficien desta iniciativa.