A área de Medio Ambiente do Concello de Lugo precintou “por seguridade” unha randeeira inclusiva situado no parque infantil de Albeiros, tras sospeitar que podería “non cumprir todos os requisitos de seguridade”.
O edil Álvaro Santos explicou que a alerta “se detectou noutra localidade española”, onde unha nena “sufriu lesións nunha man mentres xogaba” nunha randeeira similar.
Foi entón cando a empresa subministradora avisou aos municipios que contaban cunha instalación deste tipo para advertirlles. De forma “inmediata”, o Concello de Lugo procedeu a clausurala ata que se teña a “absoluta certeza de que cumpre todas as garantías”.
O concelleiro explicou que confían en que a inmovilización “se trate de cuestión de días” e, mentres tanto, desculpouse polas molestias que lle poida causar aos veciños.
Por outra banda, o edil de Medio Ambiente explicou que na mañá deste venres foi necesario intervir en varios puntos da cidade ante a xeración de bolsas de auga debida á cantidade de precipitacións rexistradas nas últimas horas.
