O presidente da Audiencia Provincial de Lugo, José Antonio Varela Agrelo, afirmou este xoves sobre a sanción á maxistrada María Jesús Pérez García, tamén coñecida como a ‘xuíza do tarot’, que este “tipo de cousas hai que velas con normalidade”.
María Jesús García, que exerceu como xuíza de vixilancia penal en Lugo e que agora actúa como responsable de violencia de xénero nos xulgados da Coruña foi sancionada polo Consello Xeral do Poder Xudicial (CGPJ) con dous meses de suspensión no exercicio das súas funcións por tramitar indultos a varios internos en centros penais cando era titular do Xulgado de Vixilancia Penal número 3 de Lugo.
A sanción tivo lugar despois de que concedese indultos parciais polo menos a tres presos cando era xuíza de Vixilancia Penal en Lugo a pesar de ser unha facultade que corresponde por lei ao Consello de Ministros do Goberno central.
O responsable dos xulgados de Lugo, Varela Agrelo, sobre o castigo a esta maxistrada sinalou que “estas cousas hai que velas con normalidade”. “Todos os servidores públicos estamos sometidos a un réxime disciplinario e cando se comete unha conduta tipificada hai que responder, e neste caso considerouse procedente e non teño nada que dicir, respecto nada máis”, sostivo.
Interpelado sobre eses indultos parciais concedidos, que é a orixe da sanción de dous meses que agora cumprirá como xuíza de Violencia de Xénero na Couña, limitouse a dicir que “sobre o fondo da cuestión” prefire “non opinar”. “Simplemente respectar a decisión, tanto se nos gusta coma se non nos gusta”, concluíu Varela Agrelo.
