O octoxenario que faltaba da residencia DomusVi de Monforte desde a noite do pasado xoves foi localizado en Bóveda por un particular e trasladado ao hospital. Fontes policiais explicaron que o home foi achado por un viandante no chan na contorna de Ribas Pequenas, no termo municipal de Bóveda, a varios quilómetros de distancia do seu centro de residencia.
Garda Civil, Policía Nacional e Policía Local activaran un operativo de procura polo centro urbano de Monforte e zonas limítrofes desde o momento no que foi comunicada a desaparición. Na procura tamén se implicaron numerosos veciños da zona.
Tras a súa localización, o home foi trasladado ao Hospital Comarcal de Monforte en estado consciente, aínda que presentaba signos de hipotermia e mazaduras. O seu estado, que a priori parecía non revestir gravidade, será chequeado no centro sanitario para descartar calquera complicación tras pasar varias noites fóra do centro.
