InicioSociedadeNenos e pais pintarán un colexio de Vilalba para evitar que o...

Nenos e pais pintarán un colexio de Vilalba para evitar que o pechen

A comunidade educativa está disposta a loitar para conseguir que este centro escolar sobreviva, non só polos nenos que agora cursan alí os seus estudos, senón porque a supervivencia do colexio é tamén o futuro de toda a zona rural do norte de Vilalba.

PUBLICADA O

- Advertisement -

A comunidade educativa do Colexio Monseivane, situado en Moreda, na parroquia de Lanzós (Vilalba-Lugo) teme polo futuro deste centro educativo debido á baixa matrícula, polo que tomou a decisión de pór en marcha diversas iniciativas que contribúan a chamar a atención, tanto das autoridades como da propia sociedade, sobre a importancia de manter vivo este centro educativo, que chegou a ter case trescentos alumnos.

Entre outras iniciativas, grazas a colaboración do claustro de profesores e da dirección do centro, os pais decidíronse a pintar o muro exterior do colexio Monseivane, ao que acoden nenos das parroquias de Lanzós, Vilapedre, San Simón, Corbelle, Samarugo e Goiriz, con axuda dos seus propios fillos.

En declaracións a Efe, a directora deste centro escolar, Irene Díaz, explicou que pais e fillos comezarán a pintar o peche perimetral do colexio este venres -día 25- a partir das dez da mañá.

“Faremos quendas, porque os nenos máis pequenos non poden estar tanto tempo fóra do recinto escolar”, precisou Irene Díaz, e o traballo distribuirase “por idades”.

Para evitar calquera tipo de risco, solicitóuselle o Concello de Vilalba que, á primeira hora da mañá, corte a estrada local que pasa por diante do colexio, petición á que o goberno local accedeu e, ademais, para colaborar con esta iniciativa, forneceu a pintura necesaria. “Para compensar a toda esa xente, ao mediodía serviremos un aperitivo”, aclarou a directora.

Esta iniciativa foi ben acollida tamén polas empresas da zona e algunha delas colaborou coa mesma mediante a cesión de produtos para ese aperitivo, como as queserías da denominación de orixe Queixo de San Simón da Costa, Dispravia ou a Parrillada O Adro.

“No colexio, ademais, fixemos un cartel co nome do centro e un debuxo da súa mascota, que se chama Galileo e é un Capón de Vilalba con forma de Queixo de San Simón”, de modo que fai referencia a dous dos produtos máis emblemáticos do municipio de Vilalba, ambos os recoñecidos coas súas correspondentes marcas de calidade.

Irene Díaz lembrou que no CEIP Monseivane chegou a haber “preto de 300 alumnos” nos anos 80, pero neste curso a matrícula quedou en só 37 nenos, polo que as familias temen que a Consellería de Educación acabe “por pechar o colexio” se se mantén esa tendencia regresiva, tal e como sucedeu con outro dos centros rurais do municipio de Vilalba, o que estaba situado na parroquia de Belesar.

A directora lembrou que a matrícula está aberta mesmo aos nenos da capital municipal, porque “temos ruta de transporte escolar que parte de Vilalba”, ademais de lembrar as vantaxes de estudar nun colexio rural como o Monseivane, onde “o ensino é de moita calidade”, dado que ao haber menos nenos por aula, préstaselle unha “atención máis individualizada” aos alumnos.

Ademais, lembrou que a comunidade escolar dun centro como este é “unha pequena gran familia”, dado que “os maiores coidan dos máis pequenos”, traballan “en proxectos comúns” e van de excursión “todos xuntos”, mesmo “cos pais”.

Unha das nais implicadas nesta iniciativa, Rocío Cuba Alonso, explicou a EFE que están dispostos a loitar para conseguir que este centro escolar sobreviva, non só polos nenos que agora cursan alí os seus estudos, senón porque, en parte, a supervivencia do colexio é tamén o futuro de toda a zona rural do norte de Vilalba, o segundo municipio máis grande de Galicia. EFE

ÚLTIMAS

O PP de Lugo acusa ó goberno local de “improvisación” e “falta de xestión” na regularización de terrazas

O PP de Lugo acusou este sábado ao goberno local de "improvisación" e "falta...

Falece un home de 62 anos tras chocar o seu vehículo contra unha árbore en Abadín

Un home de 62 anos faleceu á primeira hora deste sábado nun accidente de...

Un condutor borracho e drogado foxe tras ter un accidente e choca contra seis coches aparcados na rúa das Fontes

Un condutor ebrio foi interceptado pola Policía Local tras fuxir dun accidente e chocar contra seis...

O PP pide ao Goberno que “amplíe prazos e orzamentos” para a rehabilitación dos barrios da Milagrosa e Feijóo con fondos europeos

A presidenta provincial do PP de Lugo, Elena Candia, e a deputada lucense no...