O expediente aberto polo Consello Xeral do Poder Xudicial (CXPX) á titular do Xulgado de Instrución Número 1 de Lugo, Pilar de Lara, ademais do recurso presentado, non se abordará previsiblemente no pleno do órgano dos xuíces convocado para setembro. Así pois, a súa defensa prevé que se dilate a súa resolución.

En primeira instancia Pilar de Lara foi sancionada con sete meses e un día de emprego e soldo, o que implica cambio de destino e a súa separación das múltiples e complexas causas anticorrupción que instrúe “por desatención e atrasos inxustificados”.

O avogado da xuíza, Agustín Azparrén, lembrou que dito expediente xa non foi incluído no último pleno do mes de xullo, polo que o seguinte terá lugar o próximo mes de setembro. De todos os xeitos, o letrado madrileño sostén que “aínda que hai un prazo de tres meses para resolver (o recurso que se presentou contra a sanción), o normal é que tarden algo máis e isto é un expediente bastante coómplexo, con moitas alegacións, con moita documentación. Probablemente non vaia en setembro”.

A pesar de que Pilar de Lara se atope a expensas do que se decida polo goberno dos xuíces, aínda podería presentar máis documentación que a exima desta sanción. Azparren explicou que “se iniciou o expediente polo atraso dunhas determinadas causas que non se finalizaron, e antes que resolva o pleno (do Consello Xeral do Poder Xudicial) si que se podería presentar algunha certificación de que as causas polas que se iniciou o expediente están finalizadas”.

“Depende do que tarde en chegar ao pleno, pero poderían estar finalizadas en todo o que depende da actividade da xuíza. Outra cousa é que haxa pendentes, inhibicións, recursos ou algún informe ou escrito que non dependa dela”, abundou.

Agustín Azparren non descarta a posibilidade de que a resolución se poida dilatar ata un ano. “Estiven vendo a media de resolución de recursos do pleno do Consello Xeral do Poder Xudicial e atopei algún que tardou un ano en resolverse. A media adoita estar entre cinco e seis meses pero nalgún caso máis tempo”, advertiu.

A xuíza Pilar de Lara, pola súa banda, prosegue coas instrucións que leva, entre outras a ‘Carioca’, sobre redes de prostitución en Lugo; a ‘ Pokémon’ sobre corrupción política;  ou a do ‘ Garañón’, sobre a urbanización nas costas do parque, que estaría xa a piques de cualificar para que se sinale xuízo.