A Universidade de Santiago de Compostela (USC) amplía a súa oferta de posgrao no campus de Lugo para o vindeiro curso 2019-2020. O abano de titulacións inclúe catro mestrados novos entre os que figura un programa en Igualdade de Oportunidades e Xénero na Empresa.
“Trátase dunha oferta ampla en canto ao seu número e diversa pola súa temática”, asegurou a vicerreitora de Coordinación do Campus de Lugo, Montserrat Valcárcel. E é que estas catro novas opcións súmanse á outra ducia de mestrados oficiais que xa se impartían no Campus Terra. Ademais, Valcárcel salientou a “flexibilidade” que ofrecen algúns dos programas ao poderse cursar en liña.
A OFERTA
A programación de posgraos oficiais da USC en Lugo para o próximo ano académico inclúe títulos das áreas de Artes e Humanidades, como o mestrado en Servizos Culturais; de Ciencias (Máster Universitario en Innovación en Nutrición, Seguridade e Tecnoloxías Alimentarias; Ciencias da Saúde ( Máster Universitario en Xenómica e Xenética); Ciencias Sociais e Xurídicas (con títulos de mestrado en Avogacía, Dirección de Empresas, mestrado en Profesorado de Educación Secundaria Obrigatoria e Bacharelato, Formación Profesional e Ensino de Idiomas, e o mestrado en Dirección de Actividades Educativas na Natureza), e Enxeñaría e Arquitectura.
A oferta nesta área temática máis ligada ás enxeñarías inclúe programas habilitantes para o exercicio de profesións reguladas, como o son os mestrados en Enxeñaría Agronómica e Enxeñaría de Montes. Tamén contempla outras propostas máis axeitadas para acceder ao mercado laboral, resaltan dende a universidade. Serían, por exemplo, o mestrado en Dirección de Proxectos, Enxeñaría de Procesado de Alimentos, ou o mestrado interuniversitario en Operacións e Enxeñaría de Sistemas Aéreos non Tripulados.
