O avogado Agustín Azparren -que leva o caso da titular do Xulgado de Instrución Nº 1 de Lugo, Pilar de Lara- agarda que se trate con axilidade o recurso interposto contra a sanción do CXPX. Agarda que este asunto vaia ao pleno de finais deste mes ou, como moi tarde, no de setembro.
O recurso ao que se refire foi presentado en contra da sanción de sete meses e un día que lle impuxo a comisión disciplinaria á maxistrada por “dilacións indebidas” nas múltiples causas que leva. Tal sanción implicaría a perda de destino para De Lara. O letrado Agustín Azparren lembrou que “de momento está pendente o recurso de alzada”, que non foi ao pleno do mes de xuño, segundo sostivo. Quedaría a expensas de que “vaia a finais deste mes ou senón para setembro”, momento no que se reúnen os plenarios.
Neste sentido, comentou que xa se cumpriron tres meses dende a presentación do recurso a mediados de maio, un prazo que se podería ver ampliado incluso ata un ano. “É un prazo de tres meses e se se pasan pódese sobreentender que se desestimou o recurso, pero normalmente resólveo o pleno do Consello aínda que sexa fóra de prazo. Nalgún caso tardouse (en resolver) case un ano, pero iso non é o normal”, comentou o avogado. “O normal é que estea liquidado aos tres, catro ou cinco meses. Se non entra en xullo entrará en setembro”, estimou.
“ACELERAR” PROCESOS
En canto á xuíza Pilar de Lara, confirmou que está “tranquila” e que “está a sacar todo o que pode e acabando” con todas as instrucións que leva. Entre elas, a ‘Carioca’ sobre redes de prostitución ou a ‘Pokémon’ sobre supostos subornos a políticos a cambio de concesións públicas.
No mesmo sentido se pronunciou Azparren. El asegurou que, precisamente, a xuíza esta tratando de axilizar todos os procesos para “evitar que se puidese producir algún prexuízo” se ao final se confirma a sanción ou parte dela. Pretenden deixar todo atado por se ten que deixar o xulgado ou por se se ve suspendida durante uns meses. A intención é a de facilitar as cousas ante a hipotética chegada dun novo xuíz, xa que este ou esta veríase obrigado a estudar cada caso dende o seu inicio, algo que “suporía un atraso considerable”. Polo tanto, Azparren asegurou que “ela o que vai facer en todo o tempo que queda é tentar acabar todo o que depende dela, loxicamente”.
