O programa Coñece a túa provincia, que a Deputación de Lugo puxo a andar hai seis anos co obxectivo de promocionar os recursos turísticos dos concellos e de dinamizar as economías locais, finalizou a súa sexta edición a semana pasada. E fíxoo cun novo récord, máis de 3.000 participantes.
Coñece a túa provincia é un programa de visitas guiadas gratuítas, que se desenvolve durante os meses de abril, maio, xuño, setembro e outubro e que se articula a través de asociacións e entidades sen ánimo de lucro.
As cifras de participación, que crecen ano a ano, permite falar dunha iniciativa consolidada e que supón un notable impacto económico na hostalería e no comercio dos concellos. O investimento por persoa é de 67,40 euros, de maneira que o orzamento que mobiliza o programa supera os 200.000 euros.
Máis de 137 asociacións viaxaron por primeira vez co programa
Esta última edición rexistrou unha demanda sen precedentes, elevando o número de peticións ata as 366 solicitudes, a cifra máis alta desde a creación do programa e moi por riba das 141 rexistradas na primeira edición de 2021.
Grazas á novidade introducida nas bases da convocatoria de 2026, que priorizaba a participación de entidades que aínda non gozaran da iniciativa, acadouse un fito destacable: o 100% das 137 asociacións beneficiarias viaxaron por primeira vez, mobilizando a preto de 3.000 viaxeiros e viaxeiras de toda a provincia. O alcance territorial reflectiuse nunha ampla representación municipal, con colectivos procedentes de multitude de concellos, como Lugo (26), Vilalba (11), Ribadeo (7), Foz (6), entre outros.
44 rutas xerais e 7 adaptadas
O programa mantivo un catálogo de 44 rutas xerais e 7 adaptadas, específicas para persoas con discapacidade física, distribuídas polos 67 concellos da provincia de Lugo.
Para garantir o equilibrio territorial e a máxima pluralidade, estableceuse un límite xeral de sete asignacións por itinerario (exceptuando colectivos de menores, ANPAs ou asociacións de persoas con discapacidade).
A Ribeira Sacra e A Mariña centran a maior demanda
Entre os percorridos máis demandados e executados ao longo da tempada destacaron as rutas por Sober e Monforte (9), Chantada e O Saviñao (8), Barreiros e Ribadeo (8), ou Quiroga (7), entre outras, demostrando o interese crecente da cidadanía por redescubrir a riqueza cultural, paisaxística e etnográfica da provincia de Lugo.
Transporte, xantar, guía e museos
As xornadas inclúen todos os servizos para os colectivos participantes: transporte de ida e volta, póliza de seguros de viaxeiros, un menú de xantar baseado en produtos de proximidade, servizo de guía oficial de turismo e as entradas a museos, obradoiros artesáns e itinerarios en catamarán.
Ademais, cada itinerario complétase cunha visita a un dos centros dependentes da Deputación, o que permite que a cidadanía coñeza in situ instalacións e servizos da Deputación, como o Pazo de San Marcos (sede da institución), a Granxa Gayoso Castro, o Mazo de Santa Comba, o Centro de Interpretación Terras do Miño ou a Produtora de Audiovisuais.
A Deputación acollerá este domingo a exposición de cogomelos da Sociedade Micolóxica Lucus
A Deputación de Lugo acollerá este domingo, 8 de novembro, a XXIV Exposición de Cogomelos que organiza a Sociedade Micolóxica Lucus. O corredor do Pazo de San Marcos volverá converterse nun espazo de divulgación e coñecemento da riqueza micolóxica da provincia, cunha mostra que cada ano atrae a centos visitantes e que xa é unha das citas clásicas do outono lucense.
A exposición permitirá observar diferentes especies de cogomelos representativas dos distintos hábitats da provincia, debidamente identificadas e acompañadas de información de interese. Nalgunhas edicións chegaron a mostrarse ata 300 especies, aínda que nesta ocasión se prevé unha cifra menor debido á seca.
A mostra completarase cunha exposición fotográfica dedicada aos cogomelos e aos hábitats micolóxicos da provincia. E os visitantes poderán acceder a unha presentación audiovisual sobre micoloxía e observar, a través dunha lupa binocular, diferentes cogomelos e as súas estruturas.
Durante toda a xornada, membros da Sociedade Micolóxica Lucus estarán presentes para atender as preguntas dos visitantes. A exposición poderá visitarse o domingo en horario de 11:00 a 14:00 horas e de 16:00 a 20:30 horas. O acto institucional de inauguración terá lugar ás 12:00 horas e a entrada será libre e gratuíta.
A Sociedade Micolóxica Lucus
A Sociedade Micolóxica Lucus conta co apoio da Deputación de Lugo e está integrada actualmente por 285 socios, o que a converte na segunda entidade deste ámbito con maior número de membros de Galicia. Ademais, este ano celebra o seu 25 aniversario, unha traxectoria dedicada ao estudo, á divulgación e á posta en valor do patrimonio micolóxico.
A actividade contribúe tamén a dar a coñecer a biodiversidade da Reserva da Biosfera Terras do Miño, xestionada pola Deputación. A Sociedade Micolóxica Lucus forma parte do seu Órgano de Participación desde hai 13 anos.
A Reserva da Biosfera Terras do Miño, declarada pola UNESCO en novembro de 2002, é a máis extensa de Galicia, cunha superficie de 363.668,9 hectáreas que abrangue 26 concellos da provincia de Lugo. Este espazo natural, que ocupa arredor do 39% do territorio provincial, destaca pola riqueza dos seus ecosistemas, especialmente os vinculados á auga, aos bosques autóctonos e ás zonas húmidas. A Deputación de Lugo é a entidade encargada da súa xestión.
