A alcaldesa de Lugo, Elena Candia, participou hoxe na sinatura do convenio que permitirá acometer a reforma e ampliación das actuais instalacións da Protectora de Animais de Lugo, unha actuación coa que, segundo destacou, “se empeza a saldar unha débeda histórica” coa entidade e co benestar animal na cidade.
O acordo de colaboración asegura un financiamento de 744.436 euros (cada administración, Xunta, Deputación e Concello, achegan 248.135 euros).
Candia expresou o seu agradecemento “a todas as persoas e institucións que fixeron posible chegar ata aquí” e asegurou que este é un día de “dobre satisfacción”.
A primeira, explicou, porque “conseguimos un reto polo que levabamos traballando moito tempo”, facendo posible que a Protectora conte co financiamento necesario para acometer unha reforma moi demandada e imprescindible para mellorar as súas instalacións.
A alcaldesa quixo agradecer expresamente “o compromiso e a perseveranza da directiva da Protectora”, así como o traballo desenvolvido polos técnicos municipais, en especial polo persoal da área de Fomento, e destacou tamén a implicación da Consellería de Medio Ambiente. Do mesmo xeito, tivo un recoñecemento especial para a concelleira Mar Carballas, “pola súa sensibilidade e empatía á hora de defender e impulsar as políticas de benestar animal”.
A rexedora lembrou que, segundo lle trasladou a propia Protectora, a previsión é que as obras comecen durante o próximo mes de agosto.
“Hoxe escribimos un punto e seguido. Cumprimos a primeira parte, que era garantir o financiamento para facer realidade este proxecto. Agora toca acompañar o desenvolvemento das obras para que culminen con éxito.”
Neste sentido, reafirmou o compromiso do Concello de colaborar en todo o proceso e de facer un seguimento permanente da actuación.
COLABORACIÓN INSTITUCIONAL
A segunda satisfacción, sinalou Elena Candia, é a colaboración institucional que fixo posible este acordo entre Xunta de Galicia, Deputación Provincial e Concello de Lugo.
A alcaldesa lembrou que foi precisamente o diálogo entre as institucións o que permitiu desbloquear esta actuación e reiterou a súa vontade de seguir replicando esta forma de traballar manifestando que “este é o modelo no que creo”.
Candia concluíu asegurando que a sinatura do convenio non supón o final do camiño, senón o inicio dunha nova etapa para seguir mellorando o benestar animal en Lugo.
PISTAS DE PETANCA
A alcaldesa de Lugo, Elena Candia, e o concelleiro de Deportes, Damián Carballo, visitaron as pistas de petanca de Frigsa e as instalacións que utilizan o Club Petanca Lugo e o Club Petanca Muralla para coñecer de primeira man as súas necesidades.
Entre as peticións trasladadas polas persoas que practican este deporte figura a posibilidade de cubrir as pistas para facilitar a súa práctica durante todo o ano. Neste sentido, o Concello comprometeuse a estudar a viabilidade técnica e económica desta actuación, co obxectivo de seguir mellorando as instalacións deportivas municipais.
