Un colectivo de persoas, baixo a campaña ‘Outro garañón… na Muralla?’, veñen de facer unha concentración este xoves diante do Concello de Lugo para esixir a “inmediata paralización” das obras de urbanización que se están a acometer na confluencia do Camiño Primitivo e a Muralla, dous dos Patrimonios da Humanidade que ten a cidade de Lugo.
Así mesmo, o colectivo pide a retirada da Modificación Puntual do PEPRI no quinteiro 214A, e a redacción dun novo plan “máis respectuoso” co lugar con tanto valor histórico e patrimonial para a cidade.
A vindeira mobilización será o luns 27 de xullo ás 20 horas nas inmediacións da Porta de San Pedro, e repetirase semanalmente ata conseguir a paralización destas obras, explican nun comunicado.
